5 dagar í Ungverjaleik: Gulldrengurinn frá Székesfehérvár með þrumuskotin

Í dag eru fimm dagar í úrslitastund hjá strákunum okkar í karlalandsliðinu í fótbolta en 12. nóvember næstkomandi kemur í ljós hvort það verður Ungverjaland eða Ísland sem spilar í lokakeppni Evrópumótsins í sumar. Vísir heldur áfram að telja niður í leikinn og nú er komið að því að fjalla um skærustu framtíðarstjörnu Ungverja.

Í ungverska landsliðinu er ekki að finna stærstu nöfnin í fótboltaheiminum. Þekktustu leikmenn þess eru eflaust samherjarnir hjá RB Leipzig, Péter Gulásci og Willi Orban. En mest spennandi leikmaðurinn í ungverska liðinu og framtíðarstjarna þess er hinn tvítugi Dominik Szoboszlai, leikmaður Red Bull Salzburg.

Szoboszlai spilar oftast á vinstri kantinum en getur einnig leikið framarlega á miðjunni. Hann er gríðarlega sparkviss og með baneitraðan hægri fót. Það sást m.a. í leik Salzburg og Lokomotiv Moskvu í riðlakeppni Meistaradeildar Evrópu í síðasta mánuði. Hann skoraði þá stórglæsilegt mark með skoti í slá og inn frá vítateigshorninu.

Szoboszlai er mikill aukaspyrnusérfræðingur eins og hann sýndi í leik Ungverjalands og Tyrklands í Þjóðadeildinni í síðasta mánuði. Hann skoraði þá eina mark leiksins með mögnuðu skoti í stöng og inn af löngu færi.

Raunar hafa bæði mörk Szoboszlais fyrir ungverska landsliðið komið með skotum beint úr aukaspyrnum. Hann skoraði einnig aukaspyrnumark í 1-2 tapi fyrir Slóvakíu í undankeppni EM í fyrra. Eins og sést á mörkunum hér fyrir ofan ætti íslenska liðið að varast að gefa Szoboszlai tíma og pláss í og við vítateiginn og forðast í lengstu löð að fá á sig aukaspyrnur þar sem hann getur látið vaða.

Szoboszlai var fyrst valinn í ungverska A-landsliðið þegar hann var aðeins sextán ára og lék sinn fyrsta landsleik átján ára. Fyrsti landsleikur Szoboszlais í byrjunarliði Ungverja var í 2-1 sigri á Króötum, silfurliði síðasta heimsmeistaramóts, í undankeppni EM í mars í fyrra. Alls hefur hann leikið tíu A-landsleiki.

Szoboszlai var ekki í ungverska hópnum í síðasta mánuði þar sem hann var í sóttkví eins og aðrir leikmenn Salzburg. Szoboszlai virðist vera afar spenntur fyrir leiknum gegn Íslandi en Marco Rossi, landsliðsþjálfari Ungverjalands, að hann myndi labba frá Salzburg til Búdapest ef þess þyrfti. Milli borganna eru litlir 530 kílómetrar.

Szoboszlai fæddist í Székesfehérvár, níundu stærstu borg Ungverjalands, 25. október 2000. Faðir hans, Zsolt, var fótboltamaður og lék í efstu deild í Ungverjalandi, m.a. með Videton, aðalliðinu í Székesfehérvár. Zsolt stofnaði seinna fótboltakademíu í borginni, Fönix-Gold, þar sem sonur hans byrjaði að spila.

Szoboszlai vakti snemma athygli fyrir framúrskarandi hæfileika og þegar hann var sextán ára samdi hann við Salzburg. Þar á bæ eru menn með gott auga fyrir hæifleikaríkum fótboltamönnum og nokkrir frábærir leikmenn hafa stoppað þar á leið sinni á toppinn. Má þar m.a. nefna Sadio Mané og Erling Håland, sem Szoboszlai lék með hjá Salzburg.

Szoboszlai byrjaði að spila með Liefering, sem Salzburg á í samstarfi við, í austurrísku B-deildinni. Hann var aðeins sextán ára þegar hann lék sinn fyrsta leik fyrir Liefering. Og ekki leið á löngu þar til hann fékk tækifæri með Salzburg.

Á síðasta tímabili var Szoboszlai valinn leikmaður ársins í austurrísku úrvalsdeildinni. Hann skoraði níu mörk og lagði upp fjórtán fyrir Salzburg sem varð meistari sjöunda árið í röð.

Szoboszlai hefur einnig farið vel af stað á þessu tímabili og skorað fimm mörk og gefið átta stoðsendingar í tólf leikjum í öllum keppnum. Fjögur marka hans hafa komið í Meistaradeildinni, þar af tvö í riðlakeppninni.

Szoboszlai er samningsbundinn Salzburg til 2022 en verður eflaust farinn til stærra félags áður en langt um líður. Eins og svo margir leikmenn Salzburg gæti hann farið ofar í fæðukeðju Red Bull samsteypunnar og gengið í raðir RB Leipzig. Eða tekið enn stærra stökk. Szoboszlai hefur m.a. verið orðaður við Juventus, AC Milan og Arsenal.

Szoboszlai er gulldrengur Ungverja og hefur hæfileika til að verða þeirra besti leikmaður í nokkra áratugi, jafnvel síðan Florian Albert var uppi á sitt besta. Ungverjar vonast til að Szoboszlai hjálpi þeim til við að gera sig aftur gildandi í alþjóðlegum fótbolta. Það væri þó óskandi að þeir biðu með það þar til eftir 12. nóvember.

Leikur Ungverjalands og Íslands verður sýndur í beinni útsendingu á Stöð 2 Sport 2 fimmtudaginn 12. nóvember klukkan 19.45 en upphitun hefst klukkan 18.45. Áskrift er hægt að kaupa hér en einnig verður í boði að kaupa stakan viðburð á myndlyklum Vodafone og Símans á kr. 990, sem og í vefsjónvarpi Stöðvar 2.