Martin stiga- og stoðsendingahæstur í sannfærandi sigri Valencia

Martin Hermannsson og Valencia liðið komust á blað í dag í annarri umferð spænsku úrvalsdeildarinnar í körfubolta þegar liðið vann fimmtán stiga sigur á Morabanc Andorra, 91-76, í Íslendingaslag.

Martin Hermannsson átti mjög flottan leik og var með 14 stig og 4 stoðsendingar þrátt fyrir að fá ekki að spila nema tuttugu mínútur í leiknum. Martin var bæði stiga- og stoðsendingahæstur í liði Valencia.

Haukur Helgi Pálsson spilaði tæpar þrettán mínútur fyrir lið Morabanc Andorra og var með 6 stig og 2 stolna bolta.

Martin Hermannsson var stigalaus í fyrsta leik tímabilsins sem Valencia tapaði en það var ljóst frá fyrstu mínútu að slíkt var ekki á dagskránni í dag.

Martin skoraði sjö stig strax í fyrsta leikhlutanum og var stigahæsti leikmaður liðsins eftir það. Martin endaði fyrri hálfleikinn á glæsilegri þriggja stiga körfu og var með tólf stig eftir hann.