England fylgdi sigrinum á Íslandi eftir með markaleysi á Parken

Danmörk og England gerðu markalaust jafntefli á Parken í kvöld í riðli Íslands í Þjóðadeildinni í fótbolta.

Leikurinn var afar tíðindalítill svo til allar 90 mínúturnar en Christian Eriksen komst nálægt því að skora fyrir Dani þegar tæpar tíu mínútur voru eftir en hann skaut yfir af stuttu færi. 

Danmörk fékk betri færi í leiknum en ekki nógu góð til að skora, og í uppbótartíma munaði minnstu að Harry Kane næði að stela sigrinum fyrir England eftir hálfgert skógarhlaup Kasper Schmeichel, en skot Kane var varið á marklínu.

England er því með fjögur stig í 2. sæti riðilsins, á eftir Belgíu sem er með sex stig. Danmörk er með eitt stig og Ísland neðst án stiga.