Lampard sér eftir fúkyrðunum sem hann öskraði á Liver­pool bekkinn

Frank Lampard, stjóri Chelsea, segist sjá eftir orðaforðanum sem hann notaði er Liverpool og Chelsea mættust í ensku úrvalsdeildinni í sumar.

Mikill hiti var á hliðarlínunni á tímapunkti og Lampard dró nokkur ensk blótsyrði upp úr vasanum sem hann nú sér eftir.

„Ég sé eftir þessu,“ sagði sá enski í samtali við The High Performance hlaðvarpið. „Þegar þetta kom í fjölmiðla daginn eftir og vinur minn sendi mér þetta, þá skammaðist ég mín.“

„Ég var í augnablikinu og ég var heitur. Þetta var auðveldasti dagur allra tíma fyrir Liverpool. Þeir unnu deildina og skoruðu fullt af mörkum í  upphafi leiksins.“

Lampard og Klopp virtust hnakk rífast eins og má sjá í myndinni sem fylgir fréttinni en sá enski vildi ekki fara nánar út í það hvað hafi átt sér stað.

„Nokkrir hlutir gerðust varðandi bekkinn sem ég er ekki að fara nánar út í en mér leið eins og ég þyrfti að verja félagið. Ég átti ekki í neinum vandræðum með að sjá Liverpool fagna.“

„Þetta var ekki vanvirðing gagnvart Klopp því ég ber mikla virðingu fyrir honum. Þetta var í hita leiksins og ég mun leggja þetta til hliðar þegar ég sé hann aftur.“

„Þú getur ekki tekið ástríðuna úr leiknum,“ sagði Lampard.