Fjögur ný innan­lands­smit

Alls greindust fjórir með virkt kórónuveirusmit innanlands síðasta sólarhringinn. Sólarhringana tvo þar á undan höfðu fimm manns greinst innanlands báða dagana.

Þá greindust þrír með kórónuveirusmit á landamærunum og niðurstöðu mótefnamælingar beðið í öllum tilvikum.

Tveir af þeim fjórum sem greindust innanlands í gær voru í sóttkví og tveir ekki. Þetta kemur fram í uppfærðum tölum á síðunni covid.is.

Eins og stendur eru 96 í einangrun og fjölgar um einn milli daga. Þá eru 612 í sóttkví og fer þeim fækkandi, en 720 voru í sóttkví í gær. 24.314 hafa lokið sóttkví frá því að faraldurinn hófst hér á landi.

Samkvæmt tölum á covid.is liggur enginn á sjúkrahúsi af völdum veirunnar. Frá upphafi faraldursins hafa tíu látist af völdum Covid-19 hér á landi.

518 einkennasýni voru tekin í gær á sýkla- og veirufræðideildinni og hjá Íslenskri erfðagreiningu og 1.372 sýni voru tekin á landamærunum. Þá var 91 sýni tekið í skimun hjá Íslenskri erfðagreiningu.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur er 17,7, en var 17,2 í gær. Þá er nýgengi landamærasmita nú 7,6, en var 7,4 í gær.