Hekla stærst umboða í rafknúnum bifreiðum

Bílaumboðið Hekla er með mesta markaðshlutdeild í rafbílum og hefur til sölu tvo vinsælustu bílana á einstaklingsmarkaði.

Samkvæmt fréttatilkynningu frá Heklu, hóf Hekla árið með sterkri markaðshlutdeild fyrsta mánuð ársins og heldur áfram á afar góðu róli eins og tölur frá febrúar bera með sér. Hekla er með 25% markaðshlutdeild á heildarmarkaði fólks- og sendibíla sem er 12 prósentustigum hærra en á sama tíma í fyrra þrátt fyrir að fólksbílamarkaðurinn hafi dregist saman um 15%. Þá er Hekla í 1. sæti í sölu til einstaklinga með 24,4% hlutdeild og í 2. sæti í sölu til fyrirtækja og bílaleiga. Heilt yfir er mikill byr með vörumerkjunum fjórum; Audi, Volkswagen, Skoda og Mitsubishi, ekki síst þegar kemur að vistvænum bifreiðum.

Meðal hreinna rafbíla slær Audi öðrum merkjum við með 18,7% allra seldra rafbíla og Volkswagen er í 2. sæti í sölu rafbíla með tæpa 15% hlutdeild. Þegar horft er á heildarsölu raf- og tengiltvinnbíla á árinu eru Heklumerki áberandi vinsælust og samtals eru Audi, Volkswagen og Mitsubishi með yfir 37% af heildarsölu slíkra bíla.

Mitsubishi leiðir áfram tengiltvinnbílamarkaðinn með Outlander PHEV sem er með 27,7% hlutdeild og hann er jafnframt mest seldi bíllinn til einstaklinga á Íslandi. Í öðru sæti yfir mest selda bíla til einstaklinga í mánuðinum er hinn alrafmagnaði Audi e-tron. Þess má svo geta að Hekla er með 92,8% hlutdeild þegar kemur að metanknúnum bifreiðum.

„Við erum ákaflega stolt af árangri okkar í sölu á vistvænum bílum og það er margt spennandi á döfinni í þeim efnum sem við teljum að geti styrkt enn frekar þetta góða gengi. Til að nefna dæmi þá er tengiltvinnbíllinn Skoda Superb iV væntanlegur til okkar sem og rafbílinn Skoda Citigo e iV. Þá hefur Volkswagen kynnt nýja rafbíla á betra verði og nú síðast e-up og e-Crafter ásamt því að það styttist í komu ID. rafbílalínunnar,“ segir Gunnar Smári Eggertsson Claessen vörustjóri hjá Heklu.