Ekki til við­bragðs­á­ætlun vegna heita vatnsins á Suður­nesjum

Ekki eru til neinar áætlanir um það hvernig bregðast skuli við því ef framboð á heitu vatni stöðvast til sveitarfélaga á Suðurnesjum vegna jarðhræringa eða eldsumbrota.

Frá þessu er greint á forsíðu Fréttablaðsins í dag og rætt við Júlíus Jón Jónsson, forstjóra HS Veitna, en fyrirtækið á og rekur dreifikerfi fyrir heitt vatn í öllum sveitarfélögum á Suðurnesjum auk þess sem það sér einnig Grindvík, Garði, Reykjanesbæ og flugstöðvarsvæðinu fyrir ferskvatni.

Óvissustigi hefur verið lýst yfir vegna jarðhræringa vestan við fjallið Þorbjörn sem er í nágrenni Grindavíkur.

Óvenjulegt landris er í Eldvörupum og Svartsengi en aðalvatnstökusvæði HS Veitna er í gjá í hrauninu Lágum sem er um þrjá kílómetra norður af Svartsengi. Er ferskvatninu síðan dælt á Svartsengi þar sem það er hitað upp með jarðhitagufu.

„Það er helst heita vatnið sem við óttumst. Vandinn er ekki eins mikill ef kalda vatnið færi því við getum nálgast það úr öðrum vatnsbólum skammt frá. Það yrðu þó vissulega truflanir til skamms tíma. Enn sem komið er eru engar áætlanir uppi um hvernig við leysum vandann ef framleiðsla í Svartsengi myndi stöðvast,“ segir Júlíus í samtali við Fréttablaðið.

Erfitt að réttlæta útgjöld í aðra varavirkjun

Hann leggur þó mikla áherslu á að rétt sé að halda ró sinni þar sem mjög litlar líkur eru á því að allt fari á versta veg og ekki verði hægt að halda uppi framleiðslunni í Svartsengi. Það þurfi þá að ræða möguleg viðbrögð við slíkum hamförum.

Erfitt sé að vera undirbúinn undir allar sviðsmyndir og þá þurfi einnig að hafa í huga hversu langt sé réttlætanlegt að ganga í slíkum undirbúningi að sögn Júlíusar.

„Það er erfitt að réttlæta útgjöld í aðra varavirkjun sem væri til taks ef allt færi á versta veg,“ segir hann.

 

Í tilkynningu á heimasíðu HS Veitna í gær kom fram að fyrirtækið væri að skoða hvaða afleiðingar það hefði á þjónustu fyrirtækisins ef jarðhræringarnar verða meiri en nú er.

„Í upphafi er rétt að geta þess að mjög ólíklegt er að tjón verði á dreifikerfum HS Veitna sem leiði til takmarkana á þjónustu. HS Veitur treysta hinsvegar á afhendingu á heitu og köldu vatni frá HS Orku og síðan raforku frá Landsneti og þar eru stóru spurningarnar.

Möguleikarnir eru vissulega óteljandi, í allra versta falli verður gos sem veldur (verulegu) tjóni á orkuveri HS Orku. Gerðist það, sem reyndar verður að teljast mjög ólíklegt, verða óhjákvæmilega verulegir erfiðleikar á orkuafhendingu á svæðinu.

Miklu líklegra er, ef yfirleitt verður gos, að til einhverra skemmda gæti komið á vatnslögnum og rafstrengjum en viðgerðir á slíkum skemmdum ættu ekki að vera stórmál,“ segir á vef HS Veitna þar sem lesa má nánar um málið.