Padova staðfestir komu Emils

Knattspyrnumaðurinn Emil Hallfreðsson mun leika með Padova í ítölsku C-deildinni út yfirstandandi leiktíð en félagið staðfesti þetta á heimasíðu sinni í dag.

Emil hefur æft með uppeldisfélagi sínu, FH, í vetur og leikið nokkra æfingaleiki með Hafnfirðingum en hann hefur verið án félags síðan hann yfirgaf ítalska úrvalsdeildarliðið Udinese síðasta vor.

Padova er í 4.sæti í Serie C en liðið féll úr B-deildinni á síðustu leiktíð. Emil, 35 ára, gerir samning til næsta sumars við félagið.

Emil hefur leikið í ítalska boltanum frá árinu 2007 ef undan er skilið eitt tímabil þegar hann lék sem lánsmaður hjá Barnsley í Englandi.