Sím­talið frá Klopp gerði gæfu­muninn fyrir nýjasta leik­mann Liver­pool

Símtal Jurgen Klopp til Kostas Tsimikas, nýjasta leikmanns Liverpool, er sagt hafa gert gæfumuninn í að leikmaðurinn gekk í raðir félagsins.

Grikkinn gekk í raðir Liverpool fyrr í vikunni en hann æfði í fyrsta skipti með liðin uá mánudag eftir að Liverpool borgaði rúmar ellefu milljónir punda fyrir hann.

Klopp á að hafa hringt í Tsimikas og sannfært hann um að koma til félagsins en gríska dagblaðið Sportime segir frá þessu.

„Ákvörðunin er þín. Við viljum fá þig og þú hentar vel í okkar verkefni og hvernig við viljum spila,“ á Klopp að hafa sagt við Grikkjann.

Tsimikas lék sinn fyrsta leik fyrir Olympiakos í desember árið 2015 og hefur allt í allt leikið 86 leiki fyrir gríska stórliðið.

Hann mun þó væntanlega þurfa sætta sig við bekkjarsetu enda Andy Robertson vinstri bakvörður Liverpool númer eitt.