Þríeykið snýr aftur á upplýsingafundi í dag

Almannavarnadeild ríkislögreglustjóra og embætti landlæknis boða til upplýsingafundar vegna faraldurs kórónuveiru klukkan 14 í húsakynnum landlæknisembættisins við Katrínartún. 

Hið svokallaða þríeyki, Víðir Reynisson, yfirlögregluþjónn hjá ríkislögreglustjóra, Þórólfur Guðnason sóttvarnalæknir og Alma D. Möller, landlæknir, koma öll þrjú saman á ný eftir talsvert hlé. Með þeim á fundinum verður Óskar Reykdalsson, forstjóri Heilsugæslunnar á höfuðborgarsvæðinu.

Óskar og þríeykið munu fara yfir stöðu mála varðandi framgang faraldurs kórónuveiru hér á landi. 

Dagurinn í dag markar nokkur tímamót en á hádegi, tveimur tímum fyrir upplýsingafund, taka gildi hertar aðgerðir vegna þess fjölda smita sem komið hefur upp á landinu síðustu daga. Fjöldamörk samkomubanns lækka þar með niður í hundrað og þá verður tveggja metra reglunni komið aftur á.

Upplýsingafundurinn verður sýndur í beinni útsendingu hér á Vísi og á sjónvarpsstöðinni Stöð 2 Vísi.