Sturla liðsinnir framboði Guðmundar

Sturla Jónsson, vörubílstjóri og stjórnmálamaður, er á meðal umboðsmanna forsetaframboðs Guðmundar Franklíns Jónssonar, sem býður sig fram gegn Guðna Th. Jóhannessyni, sitjandi forseta.

Guðmundur Franklín birti mynd á Facebook-síðu sinni, þar sem Sturlu er meðal annarra að sjá.

„Hér eru umboðsmenn mínir á fundum í dag í Ráðhúsinu með kjörstjórn Reykjavíkur. Við auglýsum hér með eftir fólki sem vill og getur hjálpað okkur á kjördag,“ skrifar Guðmundur með myndinni. Á myndinni má einnig sjá Gunnlaug Ingvarsson, formann Frelsisflokksins, Önnu Maríu Sig­urðardótt­ur og Árna Frank­lín Guðmunds­son, son Guðmundar.

Sturla Jónsson hefur alls fjórum sinnum farið í framboð hér á landi. Þrisvar til Alþingis og einu sinni til embættis forseta lýðveldisins.

Árið 2009 bauð Sturla sig fram sem oddviti Frjálslynda flokksins í Reykjavíkurkjördæmi suður. Fékk flokkurinn 700 atkvæði í kjördæminu og náði ekki manni á þing.

Sturla gerði aðra atlögu að sæti á Alþingi árið 2013, þá undir merkjum síns eigin flokks, sem bar einfaldlega heitið framboð Sturlu Jónssonar. Aftur bauð hann fram í Reykjavíkurkjördæmi suður, en framboðið hlaut 222 atkvæði í kjördæminu og náði ekki inn á þing.

Árið 2016 var Sturla einn níu frambjóðenda sem var á kjörseðlinum í forsetakosningunum, 25. júní 2016. Fór svo að Sturla hlaut 6.446 atkvæði, eða 3,5% og var sá fimmti atkvæðamesti í forsetakjörinu. Guðni Th. Jóhannesson sigraði kosningarnar með 39,1% atkvæða.

Sturla var síðast í framboði síðar sama ár, þá til Alþingis. Hann bauð sig fram sem oddviti Dögunar í Suðurkjördæmi. Flokkurinn hlaut 611 atkvæði í kjördæminu, og náði ekki manni á þing.