CrossFit samtökin virðast vera loksins að vakna og átta sig betur á stöðunni og mikilvægi þess að þau tali gegn allri mismunun. Þar á bæ lofa menn nú betrumbótum hvað varðar alla mismunun og ætla sér að passa upp á það að það sé tekið á móti öllum í CrossFit samtökunum.
Það hefur vissulega tekið sinn tíma að fá viðbrögð frá CrossFit samtökunum sem hafa staðið hljóð í því mikla óveðri sem hefur geysað í CrossFit heiminum síðustu vikur.
Í stað þess að tala gegn mismunun og styðja réttindabaráttu svartra á þessum erfiðu tímum þá kom ekkert frá CrossFit samtökunum nema rasíkst tíst frá einvaldinum Greg Glassman. Greg Glassman baðst fyrst afsökunar og sagði svo af sér sem framkvæmdastjóri og gaf næstráðanda sínum stöðuhækkun. Það dugði skammt enda óánægjan mikil.
Viðbrögðin voru hörð í CrossFit heiminum, stöðvarnar sögðu skilið við CrossFit samtökin í bílförmum og íþróttafólkið lét yfirvaldið í íþróttinni sinni heyra það. Þar á meðal var Katrín Tanja Davíðsdóttir sem á endanum sagðist ekki ætla að keppa á heimsleikunum fyrr en hún sjái alvöru breytingar í fílabeinsturninum hjá höfuðstöðvum CrossFit samtakanna.
Nú hafa tveir pistlar litið dagsins ljós á miðlum CrossFit samtakanna á frekar stuttum tíma þar má heyra sjá nýja stefnan um að taka vel til innan raða samtakanna. Á þjóðhátíðardegi Íslendinga mátti þannig sjá raunveruleg skilaboð um að samtökin væru opin fyrir öðrum og mun betri vinnubrögðum.
CrossFit samtökin settu þá inn myndband á á Instagram síðu heimsleikanna 2020 þar sem mátti sjá breytt merki leikanna þar sem voru þjóðfánar heimsins voru komnir inn á merkið.
Ísland hefur skapað sér stórt nafn innan CrossFit íþróttarinnar og íslenski fáninn er líka á mjög áberandi stað fyrir miðju merki heimsleikanna 2020. Það var ekki bara myndbandið sem kom á síðuna heldur einnig loforð um endurskoðun ferla og áætlun um að laga hlutina innan CrossFit samtakanna.
„Þetta eru tímamót fyrir CrossFit samfélagið okkar út um allan heim,“ byrjaði pistillinn á Instagram síðu heimsleikanna í CrossFit.
„Nú er rétti tíminn til að horfa inn á við og velta fyrir sér hvar við höfum verið og hvert við séum að fara. CrossFit heimsleikarnir munu gangast undir menningarlega endurskoðun þar sem öll mismunun verður rannsökuð sérstaklega sem og allir möguleikar til að sjá til þess að það sé tekið á móti -öllum innan okkar raða,“ segir í pistlinum.
Þar eru síðan tekin til þrjú lykilatriði í þessari endurskoðun á starfi innan CrossFit samtakanna og CrossFit heimsins.
„Setja upp utanaðkomandi mat og greiningu á stöðu mismununar innan okkar raða og hvernig við stöndum okkur sem fulltrúar fyrir alla menningarheima.“
„Framleiða efni sem sýnir og skapar tækifæri fyrir samfélag svartra og annarra minnihlutahópa.“
„Halda áfram að safna saman, skipuleggja og dreifa ábendingum um betrumbætur innanhúss og leita ráðgjafar hjá sérfræðingum í mismunun.“
Í færslunni kemur síðan fram að þetta sé upphafið að ferli sem mun taka sinn tíma að klára.
„Við gerum okkur grein fyrir því að það er ekki nóg að segja þetta. CrossFit er að vinna í því að þróa stöðug viðbrögð þar sem verkin verða látin tala. Takk fyrir alla þolinmæðina á meðan við vinnum að því að vinna með samfélaginu í að bæta okkur á þessum sviðum,“ sagði að lokum í þessum athyglisverða pistli.
Það var þó eitt sem breyttist ekki að það var ekki gefin möguleiki á að skrifa sínar athugasemdir við pistilinn. Það hefur verið þannig allan tímann og CrossFit samtökin „þora“ ekki enn að heyra skoðanir fylgjenda sinna á samfélagsmiðlum samtakanna.
Hvort þetta dugir til að breyta afstöðu íþróttafólksins, sem ætlaði ekki að mæta á heimsleikanna nema að það kæmu alvöru breytingar, verður að koma í ljós. Þetta er í það minnsta skref í rétta átt.
