Dagskráin í dag: Valur mætir KR, spænski boltinn, golf og Gummi Ben hitar upp fyrir Pepsi Max karla

Það verður nóg um að vera á Stöð 2 Sport í dag nú þegar boltinn er byrjaður að rúlla á Íslandi og á Spáni, og bestu kylfingar heims farnir af stað á PGA-mótaröðinni.

Íslandsmeistarar Vals taka á móti KR í fyrsta leik Pepsi Max-deildar kvenna og hefst bein útsending kl. 19. Valskonur ætla sér titilinn og KR hefur fengið sterka leikmenn frá síðustu leiktíð og er spáð sæti í efri hluta deildarinnar, svo von er á hörkuleik. Á morgun verða svo fjórir leikir í deildinni í beinni útsendingu á Stöð 2 Sport.

Gummi Ben fer ásamt sérfræðingum sínum yfir málin í Pepsi Max Stúkunni í kvöld, nú þegar sólarhringur er í að Pepsi Max-deild karla fari af stað og loftið lævi blandið.

Tveir leikir eru í beinni útsendingu í spænsku 1. deildinni, á Stöð 2 Sport 2. Granada og Getafe mætast kl. 17.15 og Valencia og Levante kl. 19.45. Valencia er í baráttunni um Evrópusæti, í 7. sæti en aðeins fjórum stigum frá 4. sætinu, en Levante er í 13. sæti. Getafe er sömuleiðis í harðri baráttu um að komast í Meistaradeild Evrópu, í 5. sæti, en Granada er í 9. sæti.

Keppni á Charles Schwab Challenge golfmótinu heldur áfram í Texas þar sem bestu kylfingar heims leika annan hring sinn á þessu fjögurra daga, langþráða móti. Því fyrsta eftir hlé vegna kórónuveirufaraldursins. Mótið er í beinni útsendingu á Stöð 2 Golf.

Ýmislegt fleira er á dagskrá á sportrásum Stöðvar 2 en dagskrána má finna hér.