Valur fær 2,04 metra markvörð frá Pick Szeged

Valur hefur fengið markvörðinn Martin Nagy á láni frá ungverska stórliðinu Pick Szeged út næsta tímabil.

Nagy, sem er 21 árs, er ætlað að fylla skarð Daníels Freys Andréssonar hjá deildarmeisturum Vals.

Ungverjinn er engin smásmíði en hann telur heila 2,04 metra. Hann hefur verið þriðji markvörður Pick Szeged á eftir Mirko Alilovic og Roland Mikler. Hjá Pick Szeged lék hann með Stefáni Rafni Sigurmannssyni.

Nagy hefur verið fastamaður í yngri landsliðum Ungverjalands og þykir mjög efnilegur markvörður.

Valur varð deildarmeistari á síðasta tímabili. Keppni var hætt um miðjan mars vegna kórónuveirufaraldursins.