„Ég er ekki byrjaður í spænskunámi“

Ajax gæti þurft að horfa á eftir hollenska landsliðsmanninum Donny van de Beek í sumar en leikmaðurinn kveðst ekki búinn að taka ákvörðun um framtíð sína.

Van de Beek segir ekki rétt að búið sé að ganga frá því að hann fari til Real Madrid.

„Það er gaman að spila í sólinni en nei, ég er ekki byrjaður í spænskunámi. Ég hef ekki sagt já við neinn. Þetta er allt opið,“ sagði leikmaðurinn við Helden.

„Ég veit hvað ég hef hér. Ég er dáður í Ajax og ég dýrka Ajax. Mér þarf að líða vel hjá mínu félagi, það er ekki nóg að félagið vilji mig heldur þarf ég að passa inn í leikstíl þess. Auðvitað vil ég líka vita hversu mikið ég fæ að spila,“ sagði Van de Beek.