Toyota Supra tekin til kostanna á Nürburgring

Christian Gebhardt frá Sport Auto tók nýja Toyota Supra til kostanna á hinni frægu Nürburgring braut í Þýskalandi. Afraksturinn má sjá í myndbandi í fréttinni.

Toyota hóf formlega sölu á fimmtu kynslóðinni af Supra á þessu ári. Supra er framleidd í samstarfi við BMW og byggð á grunni frá þýska framleiðandanum. BMW framleiðir bíl sem heitir BMW Z4 sem er náskyldur Supra.

Tíminn sem Gebhardt náði á Supra var 7 mínútur, 52 sekúndur og 17 hundruðustu úr sekúndu. Skemmst er frá því að segja að Supra skákaði, með naumindum BMW M" Competition sem fór hringinn á 7:52,36 í október í fyrra í höndum sama ökumanns.

Fyrir rúmum mánuði síðan fór Gebhardt hringinn á 8:04, þá undir stýri á Volkswagen Golf GTI TCR. Það er því óhætt að segja að Supran standi undir því að vera sportbíll.

Supra-n sem Gebhardt notaði er grunnútgáfan, ef undanskilin er fjögurra sílendera útgáfa í Japan. Toyta hefur þegar gefið út að ýmsar öflugri útfærslur af Supra verði fáanlegar. Tíminn sem tekur Supra að fara hringinn á Nürburgring ætti því að lækka umtalsvert á næstu árum.