Sóknartríó PSG kreisti fram endurkomusigur

Franska meistaraliðið PSG styrkti stöðu sína á toppi Ligue 1 í kvöld þegar liðið heimsótti Montpellier.

Heimamenn voru reyndar lengi með forystu því Leandro Paredes varð fyrir því óláni að skora sjálfsmark seint í fyrri hálfleik og hélt Montpellier forystunni alveg þar til stundarfjórðungur lifði leiks.

Þá tók sóknartríó Parísarliðsins við sér því Neymar jafnaði metin á 74.mínútu og nokkrum sekúndum síðar lagði hann upp mark fyrir Kylian Mbappe. 

Mbappe lagði svo upp mark fyrir Mauro Icardi á 81.minútu og lokatölur 1-3 fyrir PSG.