Sport

Mississippi mottan stelur senunni | Átti að heita Bjólfur

Henry Birgir Gunnarsson skrifar
Minshew II var fljótur að heilla bandarísku þjóðina.
Minshew II var fljótur að heilla bandarísku þjóðina. vísir/getty
Nýjasta stjarnan í NFL-deildinni er nýliðaleikstjórnandi Jacksonville Jaguars, Gardner Minshew II, og talað er um „Minshew Mania“ eftir magnaða byrjun hans í deildinni.

Hann þurfti óvænt að stíga inn á völlinn í fyrsta leik Jaguars er Nick Foles meiddist. Er Minshew labbaði inn á völlinn ráku menn upp stór augu. Það vissi enginn hver þetta var eða hafði heyrt þetta nafn áður. Hann skilaði frábæru verki strax þá.

Í nótt leiddi hann svo sitt lið til sigurs, 20-7, gegn Tennessee Titans í fimmtudagsleik NFL-deildarinnar. Minshew kláraði 20 af 30 sendingum sínum fyrir 204 jördum og tveimur snertimörkum. Frábær frammistaða hjá þessum 23 ára strák sem var valinn í sjöttu umferð nýliðavalsins eða númer 178.





Minshew heitir fullu nafni Gardner Flint Minshew II þó svo það sé ekki neinn annar í fjölskyldunni sem heiti Gardner! Fjölskyldunni þótti bara töff að kalla hann annan. Það er frábært.

Afi Gardners vildi þó láta nefna hann Beowulf eða Bjólf eins og nafnið útleggst á íslensku. Strákurinn er að fá mikla athygli í dag en sú athygli yrði líklega talsvert meiri ef hann héti Bjólfur.





Það er ekki bara spilamennska Minshew sem hefur vakið athygli því yfirvaraskeggið þykir líka af dýrari gerðinni. Það er kallað „The Mississippi Moustache“ ytra eða bara Mississippi mottan. Meira að segja andstæðingar hans voru komnir með mottu í nótt og strákurinn henti í gott grín.





Strákurinn nýtur sín í sviðsljósinu og var léttur, ljúfur og kátur í viðtalinu eftir leikinn í gær. Skömmu síðar fór hann inn í klefa og teygði á pungbindinu einu saman. Hefð sem vekur eðlilega athygli.





Strax í háskóla fór hann að vekja athygli út af mottunni og svo fatastílnum. Þar hefur hann alltaf farið sínar eigin leiðir.





Það fara alls konar hetjusögur og annað af Minshew en hann í það minnsta virðist ekki víla fyrir sér að veiða risafiska með berum höndum.





Það skemmir svo ekkert fyrir stemningunni að pabbinn, Flint, er hrikalega flott týpa sem hefur aldrei sleppt degi í ræktinni. Hann er því mikið í mynd og þegar orðinn að stjörnu eins og strákurinn. Það er þegar komin ein goðsaga um Minshew II. Þegar hann fór að heiman í háskóla á hann að hafa sagt við föður sinn að nú væri hann karlmaðurinn á heimilinu.





Svo er ekki annað hægt en að fara á kostum þegar þú veist að þú ert með sjálfan Mike Tyson í horninu hjá þér.





Allar alvöru stjörnur eiga svo sitt eigið lag. Það er Mississippi mottan löngu komin með. Lagið er eins og við mátti búast - stórkostlegt.



NFL

Mest lesið


Fleiri fréttir

Sjá meira


×

Mest lesið