Lazio tókst ekki að stöðva sigurgöngu Inter

Inter Milan trónir á toppi ítölsku úrvalsdeildarinnar eftir fimm umferðir en lærisveinar Antonio Conte unnu 1-0 sigur á Lazio í stórleik 5.umferðar í kvöld.

Danilo D´Ambrosio gerði eina mark leiksins á 23.mínútu og tryggði Inter þar með sinn fimmta sigur í röð.

Á sama tíma tapaði Napoli sínum öðrum leik á tímabilinu þegar liðið beið lægri hlut fyrir Cagliari á heimavelli, 0-1. Til að bæta gráu ofan á svart fékk Kalidou Koulibaly að líta rauða spjaldið á lokamínútum leiksins. 

Inter Milan hefur tveggja stiga forystu á Juventus að loknum fimm umferðum.