Allt annað að sjá Tiger Woods sem er samt sex höggum á eftir fyrsta manni

Bandaríkjamennirnir Justin Thomas og Jason Kokrak eru efstir og jafnir eftir fyrsta daginn á BMW Championship mótinu í golfi sem er næstsíðasta mótið í úrslitakeppninni um FedEx bikarinn.

BMW Championship er í beinni á Stöð 2 Golf og hefst útsendingin í dag klukkan 19.00 og stendur til 23.00 í kvöld.

Sjötíu efstu kylfingarnir á stigalistanum komust áfram eftir The Northern Trust mótið um síðustu helgi og aðeins þrjátíu efstu á stigalistanum tryggja sér farseðilinn inn á Tour Championship þar sem verður krýndur nýr FedEx meistari.

Það er mikil spenna eftir fyrsta hring. Justin Thomas og Jason Kokrak léku báðir á 65 höggum eða sjö höggum undir pari. Það er vallarmet á Medinah golfvellinum. Það eru síðan aðeins tvö högg niður í 16. sæti en fimm kylfingar eru á -6 og níu kylfingar eru á -5.

Jim Furyk, Lucas Glover, Brandt Snedeker, Patrick Cantlay og Joel Dahmen eru jafnir í 3. til 7. sæti en meðal þeirra í 8. til 16. sæti eru Rickie Fowler og Adam Scott.

Thomas finished at 7-under 65 to share the early lead with Jason Kokrakhttps://t.co/ExuLLD0bGu

— CBC Sports (@cbcsports) August 15, 2019

Það var allt annað að sjá til Tiger Woods eftir erfiðleika síðustu vikna. Hann varð að hætta leik um síðustu helgi vegna bakmeiðsla. Tiger byrjaði frábærlega með þrjá fugla á fyrstu fimm holunum en kólnaði svo snögglega niður.

Tiger er í 50. sæti og sex höggum á eftir þeim Thomas og Kokrak en Woods lék á einu höggi undir pari.

„Ég er að reyna að breyta sveiflunni og er ekki alveg kominn þangað sem ég vil vera. Ég þarf endurtekningar og hef ekki náð því ennþá,“ sagði Tiger Woods sem var með fjóra fugla og þrjá skolla á hringnum.

Tiger Woods þarf líklega að ná ellefta sætinu til að tryggja sér sæti á lokamótinu. Hann þarf að hækka sig úr 38. sæti upp í 30. sæti. Miðað við spilamennskuna á fyrsta degi er honum nú spáð 47. sæti og það þarf því mikið að gerast ætli hann að spila um næstu helgi.