Brady fær nýjan samning sem gildir þar til hann verður 44 ára

Tom Brady hefur skrifað undir nýjan tveggja ára samning við NFL-meistara New England Patriots.

Brady fagnaði 42 ára afmæli sínu á laugardaginn og nýi samningurinn gildir þar til hann verður 44 ára.

Þrátt fyrir að vera kominn á fimmtugsaldurinn gefur Brady ekkert eftir. Hann varð NFL-meistari í sjötta sinn á síðasta tímabili.

Enginn leikmaður í sögu NFL hefur unnið Super Bowl jafn oft og Brady. Þá hefur hann fjórum sinnum verið valinn maður leiksins í Super Bowl, oftast allra.

Nýi samningurinn færir Brady launahækkun upp á átta milljónir Bandaríkjadala í ár.