Kári framlengir við ÍBV

Kári Kristján Kristjánsson skrifaði undir nýjan tveggja ára samning við ÍBV í gær. Þetta kemur fram á heimasíðu félagsins.

Kári sneri aftur til ÍBV 2015. Hann varð Íslands-, bikar- og deildarmeistari með liðinu á þarsíðasta tímabili.

Línumaðurinn öflugi hóf ferilinn með ÍBV og lék með liðinu til 2005 þegar hann fór til Hauka. Þar varð hann tvisvar sinnum Íslandsmeistari.

Kári, sem er 34 ára, lék sem atvinnumaður í Sviss, Þýskalandi og Danmörku og var svo eitt tímabil í herbúðum Vals (2014-15).

Á síðasta tímabili skoraði Kári 104 mörk í 26 leikjum með ÍBV. Eyjamenn enduðu í 5. sæti Olís-deildarinnar, unnu FH-inga, 2-0, í 8-liða úrslitum úrslitakeppninnar en töpuðu svo fyrir Haukum, 3-2, í undanúrslitunum.