Rostov tapar ekki með Ragnar sem fyrirliða og Mikael fiskaði vítið sem tryggði Midtjylland sigur

Ragnar Sigurðsson stóð vaktina í vörn Rostov sem vann 3-2 sigur á Arsenal Tula á útivelli í rússnesku úrvalsdeildinni í knattspyrnu í dag.

Ragnar spilaði allan leikinn í vörn Rostov sem er með sjö stig í fyrstu þremur leikjunum í Rússlandi en Ragnar tók við fyrirliðabandinu í sumar.

Björn Bergmann Sigurðarson kom inn og spilaði síðustu sex mínúturnar fyrir Rostov sem er í öðru sætinu, tveimur stigum minna en Zenit frá Pétursborg.

Midtjylland vann 1-0 sigur á AGF í Íslendingaslag í danska boltanum. Markið kom á 88. mínútu er Evander skoraði úr vítaspyrnu sem íslenski U21-árs landsliðsmaðurinn Mikael Anderson fiskaði.

Mikael kom inn sem varamaður skömmu áður en þetta er í annað skiptið í fyrstu þremur leikjunum sem hann á stóran þátt í sigri Midtjylland. Jón Dagur Þorsteinsson spilaði fyrstu 73 mínúturnar fyrir AGF.

Midtjylland er með níu stig eftir fyrstu þrjá leikina en AGF er einungis með eitt stig af níu mögulegum.