Brúð­kaups­ljós­myndari her­toga­hjónanna varð fyrir barðinu á tölvu­þrjótum

Ljósmyndarinn Alexi Lubomirski lenti í því leiðinlega atviki að verða fyrir tölvuárás nú á dögunum. Óprúttnir aðilar komust inn á tölvu hans þar sem var að finna áður óbirtar ljósmyndir úr brúðkaupi Harry Bretaprins og Meghan Markle.

Þetta kemur fram á ljósmyndasíðunni Fstoppers en þar segir að myndir úr brúðkaupinu séu farnar að skjóta upp kollinum á samfélagsmiðlum á borð við Instagram og Twitter. Heimildarmenn sem standa nærri konungsfjölskyldunni staðfesta að ljósmyndarinn hafi orðið fyrir tölvuárás.

Þá segir einnig að hundruðum ljósmynda hafi verið stolið af ljósmyndaranum og er verið að rannsaka þennan „öryggisbrest“ eins og heimildarmaður The Sun orðar það. Lögreglu hefur þó ekki verið gert viðvart.

Talsmaður ljósmyndarans neitaði að tjá sig um málið en ekki er vitað hvort búið sé að hafa uppi á þrjótinum.