Kennsluvél nauðlenti á Vestfjörðum

Engan sakaði þegar kennsluflugvél á vegum Keilis nauðlenti á Vestfjörðum síðdegis í dag. Í tilkynningu frá Keili kemur fram að einn nemandi hafi verið um borð í vélinni sem hafi sjálfur tilkynnt um atvikið. Flugvélin sé lítið skemmd.

Fram kemur einnig í tilkynningunni að flugakademía Keilis sé í nánum samskiptum við flugmálayfirvöld vegna atviksins.

Samkvæmt upplýsingum á vefsíðu flugakademíunnar heldur hún úti 24 flugvélum í tengslum við námið. Vélarnar eru af gerðinni Diamond DA20, DA40 og DA42 NG , Piper Archer DX , Piper PA44 Seminole, Technam P2002-JF, ásamt flughermisflota af gerðinni ALSIM ALX og Diamond DSIM.