Tuchel framlengir við PSG

Thomas Tuchel hefur framlengt samning sinn við Frakklandsmeistara Paris Saint-Germain til ársins 2021.

Tuchel tók við PSG fyrir tímabilið og gerði liðið að Frakklandsmeisturum.

Það var hins vegar eini titilinn sem PSG vann og sögusagnir fóru á kreik um að Tuchel yrði hugsanlega látinn fara frá félaginu eftir slakt gengi á undanförnum vikum.

PSG tapaði varla stigi fyrir áramót en gengi liðsins seinni hluta tímabils hefur verið misjafnt.

Tuchel, sem er 45 ára Þjóðverji, stýrði áður Mainz 05 og Borussia Dortmund. Hann gerði Dortmund að þýskum bikarmeisturum 2017.