Vandræði Heimis í Færeyjum halda áfram

Meistarar HB í Þórshöfn töpuðu öðrum leik sínum í færeysku úrvalsdeildinni í dag þegar þeir fengu Skála í heimsókn í Gúndadal.

Gestirnir skoruðu eitt mark í hvorum hálfleik á meðan HB skoraði ekkert. Lokatölur 0-2 fyrir Skála sem tylltu sér á topp deildarinnar með sigrinum.

Heimir Guðjónsson þjálfar lið HB og hefur liðið aðeins unnið tvo af fyrstu sjö leikjum sínum, gert þrjú jafntefli og tapað tveimur. Eru meistararnir því í 6.sæti af 10 liðum eftir að hafa verið langbesta lið deildarinnar á síðustu leiktíð.