Gunnar Nelson dansaði við Call on me í árshátíðarmyndbandi Mjölnis

Bardagakappinn Gunnar Nelson fór á kostum í árshátíðarmyndbandi starfsmanna bardagafélagsins Mjölnis en myndbandið var sýnt á árshátíð félagsins um helgina.

Gunnar æfir og starfar í Mjölni er hann er á landinu en árlega tekur starfsfólkið sig til og gerir skemmtilegt árshátíðarmyndband. Það varð einnig raunin í ár.

Starfsmennirnir dönsuðu við slagarann Call on me með Eric Prydz frá árinu 2004 en Gunnar fékk engan afslátt og var að sjálfsögðu mættur í búning. Hann dansaði með eins og má sjá hér að neðan.

Gunnar er að undirbúa sig fyrir bardaga en hann keppir um næstu helgi. Hann mun berjast við Leon Edwards á laugardagskvöldið en Vísir verður á staðnum og mun fylgjast grannt með gangi mála í vikunni.