Magnaður hringur hjá Valdísi Þóru sem er efst í Ástralíu

Valdís Þóra Jónsdóttir, atvinnukylfingur úr Leyni, fór á kostum í nótt á fyrsta hring NSW Open-mótsins sem fram fer í Ástralíu en hún er með þriggja högga forskot á toppnum eftir fyrstu 18 holurnar.

Mótið er sameiginlegt verkefni Evrópumótaraðarinnar og áströlsku mótaraðarinnar en evrópska mótaröðin er sú efsta í Evrópu í kvennaflokki.

Skagamærin spilaði fyrsta hringinn á átta höggum undir pari en hún fékk fugl strax á níunu braut þar sem að hún hóf leik. Hún bætti strax við öðrum fugli og var komin fjórum undir eftir fimm holur.

Í heildina fékk Valdís Þóra sjö fugla, einn örn og einn skolla og spilaði hringinn í heildina á 63 höggum eða átta höggum undir pari vallarins.

Næstar á eftir Valdísi Þóru eru Rebecca Artis frá Astralíu og Carmen Alonso frá Spáni en þær spiluðu báðar fyrsta hringinn á fjórum höggum undir pari.

Valdís Þóra fer af stað á öðrum hring klukkan 21.30 að íslenskum tíma í kvöld.