Sjóðir Eaton með nærri níu prósent í Eimskip 

Fjárfestingasjóðir í stýringu Eaton Vance Management eiga orðið samanlagt nærri níu prósenta hlut í Eimskip. Miðað við núverandi gengi bréfa er sá eignarhlutur metinn á um 3,3 milljarða króna.

Þeir tveir sjóðir í stýringu félagsins sem hafa hafa látið hvað mest til sín taka eftir að Eaton hóf innreið sína á hérlendan hlutabréfamarkað 2015 - Global Macro Absolute Return Advantage og Global Macro Portfolio – hafa frá því í nóvember bætt við sig um 2,7 prósenta hlut í Eimskip. Samkvæmt nýjum hluthafalista eiga sjóðirnir tveir nú sjö prósenta hlut og þá eiga aðrir sjóðir Eaton Vance, sem ekki komast inn á lista yfir tuttugu stærstu hluthafa, samanlagt um 1,7 prósenta hlut.

Eaton Vance Management hefur síðustu mánuði og misseri minnkað markvisst við sig í flestum skráðum félögum fyrir utan Eimskip og Arion banka þar sem sjóðir félagsins hafa verið að bæta við hlut sinn. Hlutabréfaverð Eimskip hefur lækkað um 13 prósent frá áramótum.