Konudagurinn, dagurinn hennar

Þessi fyrsti dagur góumánaðar hefur verið tileinkaður konum frá því um miðja 19. öld eða jafnvel fyrr að því er fram kemur á Vísindavefnum. Þó margt hafi breyst frá þeim tíma nær hefðin fyrir því að karlar gefi konum sínum blóm alla vega aftur á sjötta áratug þessarar aldar en fyrsta blaðaauglýsing þessu tengd frá Félagi garðyrkjubænda og blómaverslana er frá árinu 1957.

Þó Jón Árnason hafi ekki nefnt daginn í þjóðsögum sínum gera það aðrar heimildir frá tímabilinu. Dagurinn er nefndur í sögum eftir Guðmund Friðjónsson, þjóðsögum Sigfúsar Sigfússonar og virðist nafnið því hafa verið rótgróið í málinu. Það er svo árið 1927 þegar Almanak Þjóðvinafélagsins kemur út að dagurinn hlýtur opinbera viðurkenningu.

Hvað sem sögunni líður er komin hefð á það hjá fjölda karla að færa konu sinni blóm á þessum degi eða sýna ást sína á einhvern annan hátt. Auðvitað eru einhverjir sem neita algjörlega að láta dagatalið stjórna hegðun sinni á þennan hátt. Segjast frekar gefa blóm þegar þá sjálfa lystir. Og það er auðvitað gott og vel – svo lengi sem þá einhvern tíma lystir.

10 heimatilbúnar hugmyndir

Það er auðvitað skothelt að gefa blóm eða bjóða þinni heittelskuðu út að borða, í spa eða álíka. En það eru líka einföld viðvik sem gleðja. Hér eru nokkrar heimatilbúnar hugmyndir ef þú ert að brenna inni á tíma.

Leyfðu henni að sofa út.

Græjaðu óvænta næturpössun.

Þrífðu bílinn hennar, sérlega að innan.

Farðu í bakaríið og útbúðu djúsí bröns.

Þrífðu heimilið, líka baðherbergin!

Heitt bað, kertaljós og nudd klikkar seint.

Sjáðu um krakkana og sendu hana í happy hour.

Græjaðu kvöldverð fyrir ykkur tvö þegar þú ert búinn að svæfa.

Finndu til þáttaröð á Netflix sem þú veist að hana langar að sjá.

Kláraðu eitthvað sem hún bað þig um að klára fyrir löngu.