Evrópumeistararnir unnu eftir VAR dramatík

Evrópumeistarar Real Madrid mega telja sig heppna að hafa farið með sigur á Ajax er liðin mættust í fyrri leik 16-liða úrslita Meistaradeildar Evrópu í Hollandi í kvöld.

Heimamenn í Ajax voru mun sterkari í fyrri hálfleik og ógnuðu marki Real trekk í trekk. Þeir uppskáru sanngjarnt mark á 37. mínútu þegar Nicolas Tagliafico skoraði.

Nokkrum augnablikum eftir að búið var að flauta markið á fékk Skomina dómari skilaboð um að hann ætti að skoða atvikið á upptöku. Hann gerði það og ákvað að dæma Dusan Tadic rangstæðann og markið því af.

Tadic stóð fyrir Thibaut Courtois inni í teignum þegar skallinn kom frá Tagliafico og var Tadic hárfínt í rangstæðunni.

Staðan var því 0-0 þegar liðin fóru til búningsherbergja í hálfleik.

Leikmenn Real hafa fengið smá eldræðu í hálfleiknum og komu aðeins betur inn í seinni hálfleikinn. Karim Benzema skoraði og kom Real yfir á 59. mínútu eftir frábæran sprett frá Vinicius Junior.

Heimamenn gáfust þó ekki upp og þeir skoruðu á 75. mínútu, frábær fyrirgjöf inn á teiginn sem Hakim Ziyech hamraði í netið. Aftur ráðfærði Skomina sig við myndbandsdómgæsluna í eyranu þar sem spurning var um brot í uppbyggingu sóknarinnar, en markið fékk að standa.

Marco Asensio skoraði svo sigurmarkið fyrir Real á 87. mínútu, mark sem getur reynst mjög mikilvægt. Bæði er Real nú með tvö mörk á útivelli auk þess að vera með forystuna í einvíginu.

Sigur Real var ekki sérstaklega verðskuldaður, en það er ekki spurt að því. Ajax náði ekki að nýta sér sín færi og þarf því að sætta sig við tap.