Vandræðalega léleg tilraun til að svíkja úr tryggingum náðist á myndband

Lögreglan í New Jersey í Bandaríkjunum handtók í janúar mann fyrir tryggingasvik eftir að tilraun hans til að sviðsetja fall í vinnu sinni náðist á myndband. Saksóknarar hafa nú opinberað myndbandið þar sem hinn 57 ára gamli Alexander Goldinsky þykist detta á kaffistofu fyrirtækis sem hann vann hjá sem verktaki.

Þar má sjá Goldinsky hella klökum á gólfið áður en hann leggst niður með leikrænum tilþrifum og lætur sem hann hafi slasað sig. Hann beið á gólfinu eftir því að annar starfsmaður fyrirtækisins kom að honum.

Ekki liggur fyrir hvenær hann sviðsetti fallið en á milli 1. september og 1. nóvember í fyrra setti hann fram tryggingarkröfur vegna sjúkraflutninga og lækniskostnaðar vegna meiðsla sem hann sagðist hafa hlotið.

Hann hefur nú verið ákærður vegna svikanna en í yfirlýsingu frá saksóknurum segir að allir tapi á tryggingasvikum og allir svikarar verði lögsóttir.