Heimili landsins áfram mun meira í óverðtryggðum húsnæðislánum

Ný óverðtryggð lán viðskiptabankanna til heimila landsins, með veði í húsnæði, námu 10,6 milljörðum króna umfram uppgreiðslur í desember síðastliðnum á sama tíma og ný verðtryggð húsnæðislán til heimilanna voru aðeins 318 milljónir króna umfram uppgreiðslur.

Þetta sýna nýjar tölur Seðlabanka Íslands sem eru byggðar á upplýsingum frá bönkunum.

Mikil umskipti hafa orðið í lánabókum bankanna undanfarna mánuði, sér í lagi frá haustmánuðum síðasta árs, en þannig lánuðu bankarnir óverðtryggð lán til heimila, með veði í íbúð, fyrir samtals 35,2 milljarða króna á síðustu þremur mánuðum ársins 2018, þegar tillit hefur verið tekið til uppgreiðslna. Til samanburðar námu ný verðtryggð húsnæðislán bankanna til heimila aðeins 2,0 milljörðum króna umfram uppgreiðslur á sama tímabili.

Drógust verðtryggð húsnæðislán bankanna saman um tæpan einn milljarð í nóvember en það var í fyrsta sinn í tæp fjögur ár sem uppgreiðslur reyndust hærri en nýjar lántökur.

Sé litið til alls síðasta árs voru ný óverðtryggð lán bankanna til heimila, með veði í íbúð, samtals tæplega 88 milljarðar króna umfram uppgreiðslur á meðan ný verðtryggð húsnæðislán til heimilanna voru alls 57 milljarðar króna umfram uppgreiðslur.

Til samanburðar námu óverðtryggðu húsnæðislánin 24 milljörðum króna og verðtryggðu lánin 93 milljörðum króna umfram uppgreiðslur árið 2017.

Sem kunnugt er var met slegið í nóvembermánuði í fyrra þegar bankanir lánuðu óverðtryggð lán til heimila, með veði í íbúðarhúsnæði, fyrir 14,3 milljarða króna, að teknu tilliti til uppgreiðslna.

Vextir á óverðtryggðum lánum í bönkunum hafa hækkað verulega undanfarið, samfara aukinni ásókn heimila í slík lán, og umtalsvert umfram hækkun stýrivaxta.