Sig­ríður Margrét nýr fram­kvæmda­stjóri hjá Lyfju

Sigríður Margrét Oddsdóttir hefur verið ráðin nýr framkvæmdastjóri hjá Lyfju hf. Hún tekur við af Sigurbirni Gunnarssyni sem óskaði nýverið eftir að láta af störfum eftir tólf ára starf.

Fyrr í vikunni var greint frá því að Sigríður Margrét hefði látið af störfum sem framkvæmdastjóri Já.

Í tilkynningu kemur fram að Sigríður Margrét hafi víðtæka reynslu úr íslensku atvinnulífi og tekið virkan þátt í störfum fyrir hagsmunafélög á vegum atvinnulífsins.

„Sigríður hefur starfað sem framkvæmdastjóri um árabil og setið í stjórnum félaga. Hún situr í stjórn Viðskiptaráðs Íslands og er jafnframt formaður nýsköpunarhóps ráðsins. Enn fremur situr hún í skólanefnd Verzlunarskóla Íslands. Sigríður er með B.Sc. gráðu í rekstrarfræðum frá Háskólanum á Akureyri og hefur hún einnig sótt stjórnendanámskeið hjá IESE Business School og Harvard,“ segir í tilkynningunni.

Lyfja hóf starfsemi árið 1996 og rekur í dag 40 apótek um allt land undir merkjum Lyfju og Apóteksins. Hjá félaginu starfa rúmlega 300 manns.