Hviður upp undir 50 metra á sekúndu

Það hvessir hressilega í dag og undir kvöld verður kominn austan stormur eða rok allra syðst á landinu.

Í hugleiðingum veðurfræðings á vef Veðurstofunnar segir að á þeim slóðum gætu hviður náð upp undir 50 metra á sekúndu en gul viðvörun tekur gildi á Suðurlandi klukkan 17 í dag. Eru ökumenn því beðnir um að fara varlega.  

„Annars staðar verður þetta meira 15-23 og hviður að 35-40 m/s sem er eitthvað sem flestir eru orðnir allvanir eftir lægðir undangenginna vikna,“ segir í hugleiðingum veðurfræðings um væntanlegan storm.

Þá er spáð talsverðri rigningu á Suðausturlandi af Austfjörðum. Á morgun dregur úr úrkomu nema að það mun rigna austan til fram á kvöld.

„Síðan er útlit fyrir nokkra fremur hæga og úrkomulitla daga en þegar vind lægir á þessum árstíma styttist hratt í að hitastigið falli undir frostmark og því gætu hálkublettir myndast,“ segir í hugleiðingum veðurfræðings.

Veðurhorfur á landinu:

Hvessir í dag, austan 15-23 m/s með rigningu seinnipartinn, en 23-28 um tíma syðst. Talsverð rigning SA-lands og á Austfjörðum og dregur úr vindi seint um kvöldið. Hiti 1 til 9 stig, mildast syðst.

Lægir mikið í nótt, austlæg átt, 5-13 á morgun. Skúrir sunnan til, rigning um landið A-vert fram á kvöld, en annars úrkomulítið. Hiti 2 til 7 stig, mildast sunnan- og SA-lands.

Á þriðjudag:

Austlæg átt, 3-10 m/s og víða þurrt, en 10-15 og talsverð væta A-ast. Hægari og úrkomuminna A-til seint um kvöldið. Hiti 0 til 6 stig, mildast syðst.

Á miðvikudag:

Austlæg átt, 3-10 m/s, hvassast syðst. Rigning SA-til en annars þurrt að kalla. Hiti breytist lítið.

Á fimmtudag:

Hæg austlæg eða breytileg átt, skýjað með köflum og stöku él A-til. Allvíða frostlaust við sjávarsíðuna, en annars 1 til 8 stiga frost.