Áslaug Arna: „Öllum leið illa“

„Það tók svolítið á að vera á þinginu bæði í gær og fyrradag af því það leið öllum illa, sama á hvaða nefndarfundi maður var á.“ Þetta segir Áslaug Arna Sigurbjörnsdóttir þingmaður Sjálfstæðisflokksins um stemninguna á Alþingi og líðan samþingmanna hennar eftir að illt umtal nokkurra þingmanna Miðflokksins og Flokks fólksins náðist á upptöku og var í kjölfarið birt.

Áslaug Arna var gestur í Vikulokunum á Rás 1 í morgun og ræddi um „Klaustursupptökurnar“ svokölluðu en Gunnar Bragi Sveinsson, Sigmundur Davíð Gunnlaugsson, Anna Kolbrún Árnadóttir og Bergþór Ólason þingmenn Miðflokksins sátu að sumbli með Ólafi Ísleifssyni og Karli Gauta Hjaltasyni þingmönnum Flokks fólksins á Klausturbar þann 20. nóvember síðastliðinn. Samtal þingmannanna var tekin upp og sent til DV og Stundarinnar.

„Þetta er svo rosalega persónulegt“

Áslaug segist bæði hafa orðið reið og sár þegar hún heyrði umtal þingmannanna. Henni hafi fundist ummælin svo persónuleg og þannig í raun og veru alls ekkert „sakleysislegt“ baktal um að ræða, ef svo mætti að orði komast. Það kom henni á óvart hversu gróft og persónulegt baktalið var.

„Þetta er auðvitað samstarfsfólk manns og ég vinn náið með öllum sem formaður nefndar, úr öllum flokkum. Þetta er svo rosalega persónulegt. Ég held að upplifun þingheims síðustu tvo daga í þinginu hafi verið gríðarlega erfið bara. Þetta er auðvitað búið að hafa afleiðingar að einhverju leyti, þeir bregðast einhvern veginn við. Það er búið að reka tvo úr sínum flokki og svo hins vegar fara tveir í leyfi. Ég held það séu allir að melta hversu mikið þetta var og ótrúlega „brútal,“ segir Áslaug.

Myndi ekki viðgangast innan fyrirtækis

Hún segir að Alþingi sé um margt óvanalegur vinnustaður fyrir margra hluta sakir. Þingmaður standi frammi fyrir kjósendum sínum en hún, og aðrir samþingmenn hennar, þurfi bara að standa af sér illa umtalið og kvenfyrirlitninguna sem kristallaðist í upptökunum. Hún sæi það ekki í hendi sér að slíkt myndi viðgangast innan fyrirtækis.

„Auðvitað er þetta sérstakt en Alþingi er löggjafarvaldið og við höldum áfram og störfum með þeim sem eru kjörnir.“

Áslaugu þykir kristallast mikil kvenfyrirlitning í tali þingmannahópsins sem sat að sumbli. „Konur eru annað hvort kuntur eða kynverur,“ segir Áslaug um samtalið.

Hún segir að hún hafi orðið vör við alls konar sjónarmið en ekkert í líkingu við það sem náðist á upptökunum. Þar hafi komist upp á yfirborðið, óritskoðað og milliliðalaust tal. Á upptökunum hafi kristallast ákveðin ómenning sem mögnuð er upp innan hóps þegar enginn grípur inn í og stoppar talið af.

„Það skrítna við þetta er að maður er dreginn inn í einhverja umræðu, sérstaklega á einhverjum tímapunkti þegar haldið er að einhver upptaka sé um mig, algjörlega án nokkurs vilja manns eða löngunar til að vera að ræða þetta eða svona atvik.“