Vonar að allt fari vel hjá WOW

Katrín Jakobsdóttir forsætisráðherra segir að ríkissstjórnin fylgist auðvitað vel með gangi mála hjá flugfélaginu WOW air. Dregið hefur til tíðinda hjá flugfélaginu sem virtist á leið undir hatt Icelandair þar til hætt var við yfirtökuna í gærmorgun. Nú hefur flugfélagið komist að bráðabirgðasamkomulagi við eignastýringafélagið Indigo Partners.

Forsætisráðherra segir flugrekstur orðinn umfangsmikinn í íslensku samfélagi enda beintengdur ferðaþjónustunni. Ríkisstjórnin fylgist með gangi mála hjá WOW utan frá en Samgöngustofa fari svo með eftirlitshlutverk stjórnvalda.

Tæplega 240 manns var sagt upp á Keflavíkurflugvelli í gær hjá Airport Associates. Segja forvarsmenn fyrirtækisins um að ræða aðgerð ef allt fari á versta veg hjá WOW air. Fyrirtækið reiknar með að geta ráðið stóran hluta fólksins aftur takist að bjarga rekstri flugfélagsins. Fimmtán manns var sagt upp hjá flugfélaginu í dag.

„Ég vonast eftir því að þetta muni allt enda farsællega,“ segir Katrín.