Auknar eldvarnir í Árnessýslu

Í dag var skrifað undir samstarfssamning á milli Eldvarnarbandalagsins og Brunavarna Árnessýslu um aukningu eldvarna og innleiðingu eigin eldvarnareftirlits í sýslunni.

Markmið samningsins er að efla eldvarnir í stofnunum sveitarfélaga á starfssvæði Brunavarna Árnessýslu og á heimilum starfsfólks.

Í samningnum kemur meðal annars fram að Eldvarnarbandalagið og Brunavarnir Árnessýslu innleiði og framkvæmi eigið eldvarnareftirlit hjá stofnunum á starfssvæði brunavarnanna og sjái um fræðslu fyrir eldvarnarfulltrúa og starfsfólk. Fræðslan nær til eldvarna á vinnustaðnum og heimilum starfsmanna.

Eldvarnabandalagið var stofnað sumarið 2010 sem samstarfsvettvangur um auknar eldvarnir en það hefur útbúið ítarlegt, vandað og samræmt fræðsluefni um eldvarnir heimilisins, ásamt því að gefa út efni fyrir fyrirtæki og stofnanir um eigið eldvarnaeftirlit.