Fara fram á dauðarefsingu vegna morðsins á Khashoggi

Ríkissaksóknari Sádi-Arabíu fer fram á dauðarefsingu yfir fimm mönnum sem ákærðir eru fyrir morðið á sádi-arabíska blaðamanninum Jamal Khashoggi.

Greint var frá þessu á blaðamannafundi saksóknara í dag. Þar kom einnig fram að morðingjar Khashoggi hefðu hrint áætlunum sínum um morðið í framkvæmd þann 29. september síðastliðinn, þremur dögum áður en hann var að endingu myrtur á ræðisskrifstofu Sáda í Istanbúl. Ellefu eru ákærðir fyrir aðild að morðinu og 21 er í varðhaldi vegna málsins.

Khashoggi var einn virtasti blaðamaður Sáda en ferill hans í fjölmiðlum spannaði um þrjátíu ár. Hann var myrtur 2. október síðastliðinn, lík hans bútað niður og það síðar leyst upp, að sögn tyrkneskra yfirvalda.