Orri Páll krefst þess að umfjöllun Stundarinnar um frásögn Boyd verði stöðvuð

Lögmaður Orra Páls Dýrasonar, fyrrverandi trommara Sigur Rósar, hefur sent fjölmiðlinum Stundinni bréf þar sem hann krefst þess að umfjöllun miðilsins um frásögn Meagan Boyd, bandarískrar konur sem sakar hann um nauðgun, verði stöðvuð. Annar ritstjóri Stundarinnar segir í samtali við Vísi að krafa Orra Páls hafi komið ritstjórninni á óvart.

Orri Páll var trommari hljómsveitarinnar Sigur Rósar um nokkurt skeið en sagði sig úr sveitinni í byrjun mánaðarins vegna ásakana Boyd. Hún sakar Orra Pál um að hafa nauðgað sér tvisvar í Los Angeles árið 2013 og hafa vinkonur hennar sagst tilbúnar að styðja frásögn hennar. Orri Páll hafnar ásökunum Boyd.

Segir ásakanirnar grófar ærumeiðingar

Greint er frá því á vef Stundarinnar í kvöld að í bréfi lögmannsins sé farið fram á að Stundin birti ekki frekari umfjallanir um frásögn Meagan Boyd. Í bréfinu segir einnig að Orri Páll vinni nú að því að fá sig hreinsaðan af ásökununum en „hafði í hyggju að gera það utan kastljóss fjölmiðlanna.“ Þá telji hann ásakanirnar grófar ærumeiðingar í sinn garð, auk þess sem umfjöllun Stundarinnar sé einhliða.

„Umbjóðandi minn áskilur sér því allan rétt gagnvart fjölmiðlinum ef þessar ásakanir, sem umbjóðandi minn hefur alfarið hafnað, eru birtar og fá frekari útbreiðslu með einhliða umfjöllun í Stundinni, s.s. með viðtali við umrædda konu og fjölmiðillinn kjósi þannig að gera persónuleg málefni umbjóðanda míns að áframhaldandi fréttaefni, í stað þess að þau séu leyst á viðeigandi vettvangi,“ hefur Stundin upp úr bréfi lögmanns Orra Páls.

 

Áttu ekki von á að reynt yrði að stöðva umfjöllunina

Stundin svarar bréfinu í fréttinni um málið og segir þar að kröfu Orra Páls sé hafnað. Umfjöllunin mun birtast í prentútgáfu Stundarinnar, sem kemur út á morgun, eins og áætlað var.

Undir svarið rita Ingibjörg Dögg Kjartansdóttir og Jón Trausti Reynisson, ritstjórar Stundarinnar. Þau hafna því að umfjöllunin sé einhliða að öðru leyti en því að Orri Páll kaus að svara ekki spurningum vegna málsins.

„Krafa Orra Páls um að umfjöllunin verði stöðvuð stangast á við tjáningarfrelsi konunnar, rétt almennings til upplýsinga um það sem er í samfélagsumræðunni og svo tjáningarfrelsi fjölmiðla. Að stöðva umfjöllun núna, í þeim tilgangi að koma í veg fyrir að vitni greini frá og að konan færi fram frásögn af umræddum atvikum, er óréttlætanlegt. Stundin mun verjast fyrir dómstólum ef þess krefst.“

Sjá einnig: Jónsi og Georg samþykkja úrsögn Orra

Ingibjörg Dögg, annar ritstjóra, segir í samtali við Vísi í kvöld að bréf lögmanns Orra Páls hafi komið ritstjórninni á óvart.

„Við áttum kannski ekki von á því að það yrði reynt að stöðva þessa umfjöllun fyrirfram. Við gerðum ítrekaðar tilraunir til að ná tali af Orra Páli. Hann hafnaði því að svara okkar spurningum en sendi þetta bréf í gegnum lögmann. Og ég verð að viðurkenna að það kom á óvart.“

#Truthprevails

María Lilja Þrastardóttir, fjölmiðlakona og eiginkona Orra Páls, birti í dag mynd á Instagram-reikningi sínum af þeim hjónum. Um er að ræða fyrstu færslu Maríu Lilju á samfélagsmiðlum eftir að ásakanirnar á hendur Orra Páli litu dagsins ljós.

Hún merkti myndina með myllumerkinu #truthprevails, sem þýða mætti á íslensku sem Sannleikurinn sigrar. 

Myndina má sjá hér að neðan.

 

 

 

View this post on Instagram

Yesterday was the #hugadrummerday I’m holding mine extra tight these days. . . . . #truthprevails #lovewins

A post shared by Maria Lilja Thrastardottir (@marialiljath) on Oct 11, 2018 at 5:46am PDT