Varð að komast á klósettið í miðri keppni og bankaði upp á hjá ókunnugum | Myndband

Það getur ýmislegt komið upp á þegar þú tekur þátt í rallí. Líklega er þó óþægilegast þegar náttúran bankar upp á og þú verður að komast á salernið.

Franski ökuþórinn Pierre-Louis Loubet lenti einmitt í því á dögunum er hann var að taka þátt í kappakstri í Bretlandi.

Er Loubet gat ekki meira lagði hann bíl sínum í íbúðahverfi í Wales og grátbað um að fá að komast á klósettið. Hjónin sem þar bjuggu sáu aumur á Frakkanum og hleyptu honum inn. Á meðan beið aðstoðarmaðurinn þolinmóður út í bíl.

Er hann var farinn inn kom ljósmyndari, sem var að mynda keppnina, og tók upp myndband af því sem var í gangi enda ekki eitthvað sem gerist á hverjum degi.

Húsbóndinn tjáði ljósmyndaranum að Loubet hefði þurft að fara úr öllum gallanum svo hann kæmist á dolluna. Frakkinn var pínu skömmustulegur er hann snéri til baka væntanlega nokkrum kílóum léttari. Svo hélt hann áfram för sinni. Myndband af þessu óvenjulega „pit stoppi“ má sjá hér að neðan.