Vandi hjá Strætó ef Prime Tours missir leyfið

Allt stefnir í að Samgöngustofa muni svipta Prime Tours leyfi og að fyrirtækið muni ekki sinna akstursþjónustu fatlaðra hjá Strætó eftir daginn í dag. Tafir gætu orðið á akstursþjónustunni í næstu viku vegna þessa.

„Við erum að búast við því og við reynum allt sem í okkar valdi stendur að sinna þjónustunni. Svo þurfum við bar að sjá hvað framhaldið ber í skauti sér, hvað við getum gert næst,“ segir Guðmundur Heiðar Helgason, upplýsingafulltrúi Strætó í samtali við Vísi.

„Næstu möguleikar í stöðunni eru annaðhvort að framselja samningi Prime Tours eitthvað annað eða halda neyðarútboð.“

Ýkjur að tala um sinnuleysi

Hópur verktaka sem sinna akstursþjónustu fatlaðra lögðu niður störf klukkan ellefu í morgun vegna óánægju með að Prime Tours sinnti þjónustunni þrátt fyrir að vera í gjaldþrotaskiptum, sem og að fyrirtækið notaðist við þrjá ótryggða bíla við aksturinn.

„Ég veit að það voru einhverjir ósáttir við að þeir væru að keyra þó þeir væru í þessu ferli en það var ekki hlaupið að því að rifta samningum, lögin leyfa það ekki,“ segir Guðmundur Heiðar.

„Að tala um sinnuleysi það er ýkt, manni líður eins og það sé ákveðin gremja gagnvart Prime Tours sé að skila sér í þessu í dag.“

Guðmundur Helgi segir að þjónusta ætti ekki að skerðast yfir helgina og að vinnustöðvun verktaka hafi ekki haft áhrif í dag. Hins vegar sé næsta vika annað mál.

Hann segir jafnframt að akstursþjónustan skiptist í þrjá flokka. Í A flokki séu um 40 bílar og það séu rauðu og gulu bílarnir sem fólk sjái oft á götum höfuðborgarsvæðisins.

„Síðan kemur B flokkur. Það er kallað tilfallandi akstur og það er margir verktakar, eins og Prime Tours og margar gerðir verktaka. Þeir raðast síðan upp í forganga. Þegar A hlutinn er fullur þá sendum við út í B flokk. Þeir ráða hvort þeir séu að keyra, eins og gerðist í dag,“ segir Guðmundur Heiðar.

Ef B flokkur fyllist líka þá tekur C flokkur við og þar eru bílar frá Hreyfli. 

Uppfært 16:36

Strætó hefur sent frá sér eftirfarandi tilkynningu vegna málsins:

Í tilefni af umfjöllun fjölmiðla um gjaldþrot rekstraraðila í ferðaþjónustu fatlaðra vill Strætó koma eftirfarandi upplýsingum á framfæri.

Í gærmorgun upplýsti skipaður skiptastjóri þrotabús Prime Tours ehf. um að félagið hefði verið tekið til gjaldþrotaskipta og að hann færi með forræði þess. Samdægurs óskaði Strætó eftir því að skiptastjóri upplýsti hvort þrotabúið hygðist neyta heimildar í lögum um gjaldþrotaskipti og taka við réttindum og skyldum fyrirtækisins samkvæmt rammasamningi um ferðaþjónustu fatlaðs fólks og fatlaðra skólabarna. Formlegrar afstöðu skiptastjóra þrotabúsins er að vænta en Strætó hefur þegar gert ráðstafanir sem miðast við að fyrirtækið muni hætta akstri samkvæmt rammasamningnum í ljósi þeirrar óvissu sem enn ríkir um framhaldið.

Akstursþjónusta Strætó mun gera allt sem í hennar valdi stendur til þess að koma í veg fyrir að notendur ferðaþjónustunnar verði fyrir óþægindum vegna þessa.

Komi til þess að þrotabúið hætti akstri samkvæmt rammasamningnum mun Strætó verða að grípa til viðeigandi úrræða til að tryggja að ferðaþjónustan uppfylli áfram þær kröfur sem til hennar eru gerðar, bæði næstu daga og það sem eftir lifir af gildistíma núverandi rammasamninga, í samræmi við þau lög og reglur sem gilda um innkaup opinberra aðila.