Snedeker leiðir á fyrsta mótinu á PGA-mótaröðinni

Brandt Snedeker er með þriggja högga forystu á Safeway Open en þetta er fyrsta mótið á nýju tímabili á PGA-mótaröðinni.



Snedeker lék annan hringinn á 65 höggum og er hann samtals á 13 höggum undir pari.

"Ég spilaði mjög gott alhliða golf. Ég átti aðeins tvö léleg skot á hringnum," sagði Snedeker.



Ricky Barnes lék manna best á öðrum hringnum en hann spilaði á 61 höggi eða 11 höggum undir pari. Hann fór upp um hvorki meira né minna en 126 sæti og er í áttunda sæti.



Phil Mickelson, Ryan Moore og Michael Thompson eru jafnir á 10 höggum undir pari, þremur höggum á eftir Snedeker.