Svisslendingar „of hugrakkir“ í upphafi að mati þjálfarans

Landsliðsþjálfari Sviss, Vladimir Petkovic, sagði sitt lið hafa verið „of hugrakkt“ í byrjun leiks gegn Íslendingum en eftir fyrsta markið hafi þeir getað unnið hvaða lið sem er.

Ísland beið afhroð í leiknum og tapaði 6-0. Leikurinn byrjaði hins vegar ágætlega og áttu bæði lið ágæt færi í upphafi. Svisslendingar skoruðu hins vegar tvö mörk í fyrri hálfleik þar sem varnarmenn Íslendinga hefðu átt að gera betur og gerðu svo algjörlega út um leikinn í seinni hálfleik.

„Leikmennirnir tóku of miklar áhættur í byrjun, voru of hugrakkir,“ sagði Petkovic við svissneska fjölmiðla. Það voru ekki fjórir menn að gæta marksins að hverju sinni, eitthvað sem Petkovic leggur mikla áherslu á.

Eftir fyrsta markið tóku heimamenn leikinn yfir og sagði Petkovic „með þessum leikstíl hefðum við getað unnið hvern sem er.“