Skaut tvær konur því hann taldi kvenkyns ökumenn vanhæfa

Nicholas Dagostino, 29 ára karlmaður frá bænum Katy í Texas, hefur verið handtekinn grunaður um að skjóta á kvenkyns ökumenn. Tvær konur hafa tilkynnt samskonar árásir til yfirvalda.

Dagostino hefur játað að hafa misst stjórn á skapi sínu í umferðinni í fimm skipti síðastliðna mánuði, þar á meðal eru skotárásirnar tvær.

Konurnar voru báðar skotnar í handlegginn þegar þær keyrðu nærri heimili Dagostino. Fyrra atvikið átti sér stað í mars, en það seinna í júlí. Báðar lýstu þær atvikum á þann veg að hafa verið að keyra og fundið skyndilega fyrir sársauka í handlegg og áttað sig á því að þær höfðu verið skotnar. Önnur konan er sögð vera heppin að vera á lífi, en litlu mátti muna að verr færi.

Þegar Dagostino var handtekinn í síðasta mánuði, aðeins degi eftir að hafa verið sleppt gegn tryggingargjaldi, sagðist hann hafa skotið seinni konuna, 39 ára gamla móður, í sjálfsvörn og að hún hefði tvisvar sveigt viljandi inn á akreinina sem hann ók á. Hann hafi því skotið hana því hann taldi hana vera ógn.

Facebook-færslur lýsa andúð á konum 

Rannsakendur í málinu hafa lagt fram Facebook-færslur frá Dagostino sem þeir segja gefi til kynna að hann hafi skotið kvenkyns ökumenn af handahófi. Þá telja þeir hann hafa „mjög neikvætt viðhorf til kvenna“. 



Dennis Palmer, rannsakandi í málinu, segir Dagostino hafa birt færslur þar sem hann kvartar undan kvenkyns ökumönnum, segir þær vanhæfar í umferðinni og þeirra eini tilgangur sé að „fæða karlkyns börn“. Á Instagram-reikningi sínum birti hann svo myndir af skotvopnum, meðal annars skammbyssunni sem hann notaði til þess að skjóta konurnar.