Vann Ísland tvisvar sinnum sem þjálfari Svía

Erik Anders Hamrén var í dag ráðinn þjálfari íslenska karlalandsliðsins í fótbolta en hann hefur reynslu af því að mæta íslenska landsliðinu á þjálfaraferli sínum.

Erik Hamrén stýrði sænska landsliðinu tvisvar sinnum á móti Íslandi á þeim sjö árum sem hann var með sænska landsliðið (2009-2016).

Ísland tapaði báðum þessum leikjum og fékk á sig fimm mörk. Báðir leikirnir voru vináttulandsleikir.  

Þann fyrri vann sænska landsliðið 3-2 á Ullevi leikvanginum í Gautaborg 30. maí 2012 en þann seinni unnu Svíar 2-0 í Abú Dabí í Sameinuðu arabísku furstadæmunum.

Seinni leikurinn fór fram í janúar 2014 og þar höfðu landsþjálfararnir ekki aðgang að bestu leikmönnum sínum heldur einungis leikmönnum af Norðurlöndunum. Þar voru því hálfgerð b-landslið á ferðinni.

Leikurinn í Gautaborg í maí 2012 var fjórði leikur íslenska landsliðsins undir stjórn Lars Lagerbäck og höfðu íslensku strákarnir þá ekki unnið leik undir stjórn hans.

Erik Hamrén var aftur á móti að vinna sinn fjórða sigur á árinu 2012 með landsliði Svía og sinn 19. sigur síðan hann tók við sænska liðinu tæpum þremur árum fyrr.

Zlatan Ibrahimovic, Ola Toivonen og Christian Wilhelmsson skoruðu mörk Svía sem komust í 2-0 eftir fimmtán mínútna leik og voru líka 3-1 yfir áður en Hallgrímur Jónasson minnkaði muninn í uppbótartíma.

Leikmenn í HM-hóp Íslands í sumar sem spiluðu þennan leik á móti Svíum fyrir rúmum sex árum síðan voru þeir Hannes Þór Halldórsson, Ragnar Sigurðsson, Birkir Bjarnason, Jóhann Berg Guðmundsson, Ari Freyr Skúlason, Kári Árnason, Hólmar Örn Eyjólfsson, Aron Einar Gunnarsson, Gylfi Þór Sigurðsson, Rúrik Gíslason og Alfreð Finnbogason.