Lægð að landinu á fimmtudag

Það verður víða rólegheita veður í dag ef marka má spákort Veðustofunnar. Búast má við hægum vindi og súld eða dálítilli rigningu fyrir norðan.

Annars staðar á landinu verða hins vegar skúrir en hitinn verður á bilinu 10 til 15 stig yfir daginn. Ætla má að það verði einna hlýjast sunnantil í dag og þá einna helst inn til landsins.

Það tekur hins vegar við suðaustan stekkingur á morgun og þá sérstaklega á suðvesturhorninu. Jafnframt er gert ráð fyrir rigningu um mest allt land, hitatölur verða svipaðar og í dag en á morgun verður hins vegar hlýjast fyrir norðan.

Næsta lægð kemur svo upp að landinu á fimmtudag. Með henni hvessir og eins má búast við talsverðri vætu, þá sérstaklega á austurhelmingi landsins. „Hins vegar má hún ekki færast mikið til vesturs til þess að úrkoman nái alla leið til höfuðborgarinnar en vind ætti allavega að lægja um kvöldið,“ segir vakthafandi veðurfræðingur. Hitinn verður þá á bilinu 9 til 17 stig og verður hlýjast vestan- og norðanlands.

Veðurhorfur á landinu næstu daga

Á miðvikudag:

Suðaustlæg átt, 3-8 m/s og skúrir. Hiti 8 til 15 stig, svalast við N-ströndina.

Á fimmtudag:

Vaxandi austan- og norðaustanátt, 10-15 við SA-ströndina um hádegi, en annars hægari. Talsverð rigning S- og A-til síðdegis, en annars úrkomuminna. Dregur úr vindi og úrkomu um kvöldið. Hiti 9 til 17 stig, hlýjast V- og N-lands.

Á föstudag:

Austlæg eða breytileg átt, 3-8 m/s og rigning á köflum um landið austanvert, en annars þurrt að kalla. Hiti 8 til 18 stig, hlýjast SV-til.

Á laugardag, sunnudag og mánudag:

Útlit fyrir austlægar áttir og víða dálítil rigning eða skúrir og fremur hlýtt í veðri.