Vegagerðin vill mislæg gatnamót

Ofanbyggðarvegur frá Kópavogi til Hafnarfjarðar er eina leiðin sem hugsanlega gæti létt umferð af Reykjanesbraut og Hafnarfjarðarvegi. Þetta segir í nýrri greinargerð Vegagerðarinnar um framtíðarsýn stofnvega á höfuðborgarsvæðinu.

Í framtíðarsýninni er gert ráð fyrir að á stofnvegum verði öll gatnamót mislæg. Sveitarfélögin á höfuðborgarsvæðinu undirbúa Borgarlínu. Í skýrslunni segir, án þess að Borgarlína sé nefnd á nafn:

„Ef kostnaður vegna vega á höfuðborgarsvæðinu er ætlaður af ríkisfé er ljóst að sveitarfélögum ber að hafa samráð um legu og útfærslu þeirra. Vegagerðin leggur mikla áherslu á að skipulagsvinna á og við vegi í umsjá hennar verði ekki unnin án hennar aðkomu.“