Opnunin í Skjálfandafljóti lofar góðu

Skjálfandafljót opnaði fyrir veiðimönnum í gær og það er óhætt að segja að byrjunin þar lofi góðu.

Skjálfandafljót þykir vera eitt af mest spennandi veiðisvæðum norðan heiða enda umhverfið við veiðistaðina ægifagurt og áin krefjandi eftir því.  Það er mjög sterkur stofn í ánni og uppistaðan í veiðinni er vænn tveggja ára lax. "Það komu 9 laxar á land í gær, gæti verið meira en við vorum ekki búin að fá fréttir frá seinnipartinum í Barnafelli, það komu 2 laxar í Barnafelli fh og 7 laxar á Austurbakka efri í gær, Opnunin lofar mjög góðu og verður spennandi að fylgjast með næstu daga" sagði Stefán Sigurðsson hjá Iceland Outfitters í samtali við Veiðivísi.  Mest er veitt á tvíhendur og túpur en það er þó oft vel hægt að veiða á minni flugur og hitch hefur oft gefið laxa.  Það er þó mælt með að nota sterkar stangir því það er ekkert spaug að eiga við væna laxa í straumþungum hyl í þessari mögnuðu á.